የአእምሮ ህመም ላለበት ሰው ማለት የሌለብን ነገሮች

ሰዎች "የአእምሮ ህመም አለብኝ፡፡"ወይም " ህክምና እከታተላለሁ::"ለማለት ይፈራሉ፡፡ በአብዛኛው ሰዎች በተለየ መንገድ እንዳያዩአቸው፤ ጥሩ ያልሆኑ ንግግሮች እንዳይናገሩ በመፍራት ነው፡፡ ተገቢ ያልሆነ ንግግር የሰዉን ስሜት የመጉዳት ሀይል አለው፡፡ የበለጠ የሚጎዳው ግን ቅርብ የሆኑና የምንወዳቸው ሰዎች ንግግር ነው፡፡ አንዳንድ ጊዜ ባለማወቅ ወይም ሊያግዙ በማሰብ ሊሆን ይችላል፡፡ የምንናገረው ነገር ትልቅ ልዩነት ይፈጥራል፡ የማቅናት ወይም የመስበር፣ የመርዳት ወይም የመጉዳት፡፡የአእምሮ ህመም ላለበት ሰው ማለት የሌሉብን ነገሮች፦

 

እራስህን ነው የምታጨናንቀው፡፡

 

መጀመሪያ መጨናነቅ በአብዛኛው የእእምሮ ህመም መንስኤ ሳይሆን ውጤት ነው፡፡ በመቀጠል ደግሞ ማንም ሰው ፈልጎ ራሱን ሊያጨናንቅ አይችልም፡፡ ስለዚህ "እራስህን አታጨናንቅ" ማለት በህመም ውስጥ ያለ ሰው ላይ ትችት እንደመሰንዘር ነው፡፡

እንደውም ተመስገን በል ስንት ____ያጣ አለ፡፡

ባዶ ቦታው ላይ የተለያዩ ቃላት ተሞልቶበት በሀገራችን በብዛት የተለመደ ማፅናኛ ነው፡፡ ወደ ታች የሚደረግ ማህበራዊ ንፅፅር (downward social comparison)፡፡ ከኛ የባሰ ሁኔታ ውስጥ ሌሎች ሰዎች መኖራቸው ያለንበትን ሁኔታ ቀላል አያደርገውም፡፡ ስለ አለን ነገር ማመስገን ለአእምሮ ጤና አስፈላጊ ነው፡፡ ነገር ግን ምስጋናችን ከኛ የባሰ ሰው ስላላ መሆን የለበትም፡፡ በዛ ላይ ህመም ውድድር አይደለም፡፡ ከዛ ይልቅ የአእምሮ ህመም ያለበት ሰው የሚሰማውን ስሜት ለመረዳት መሞከር ጥሩ ነው፡፡

 

መድሃኒቱ ነው እንደዚህ የሚያደርግህ/ሽ

 

የአእምሮ ህክምና መድሀኒቶች እንደማንኛውም መድሀኒት የጎንዮሽ ጉዳት አላቸው፡፡ በአንፃሩ መድሃኒቶቹ ብዙ ሰዎችን ጥሩ እንቅልፍ የሚተኙ ፣ስራቸውን በደንብ መስራት የሚችሉ፣ትምህርታቸውን የጨረሱ፣ትዳራቸው ያልፈረሰ እንዲሆኑ ያግዛሉ፡፡ ስለ አእምሮ ህመምና ስለመድሃኒቶቹ በቂ እውቀት ሳይኖር በድፍረት "መድሃኒቱ ነው እንደዚህ የሚያደርግህ/ሽ፡፡ " ማለት አለማወቅ ነው፡፡ (ስለመድሃኒቶቹ የጎንዮሽ ጉዳት በቀጣይ ፅሁፍ ላይ ይቀርባል፡፡) የቅርባችን ሰዎች ትክክል ያልሆነ መድሃኒት እየወሰዱ ከመሰለን በእርጋታ ከነሱና ከሀኪም ጋር መነጋገሩ የተሻለ አማራጭ ነው፡፡

 

ቀላል አድርገህ እየው

 

እንቅልፍ ማጣት፣ ቀኑን ሙሉ እየተከፉ መዋል፣ እራስን ስለማጥፋት ማሰብ ቀላል አይደለም፡፡ ነገሮችን አጋንኖ ማየት ትክከል ያልሆነውን ያህል በጣም አቅልሎ ማየትም ስህተት ነው፡፡"ቀላል አድርገህ እየው፡፡"ልንባል እንችላለን፡፡ የመናገሩን ያህል ቀላል አይደለም፡፡ ድብርት ወይም ጭንቀት የአእምሮ ህመም እንጂ ቀላሉን ነገር ከባድ አድርገን ለማየት በመምረጣችን የሚመጣ ነገር አይደለም፡፡

በዋናነት የሚስፈልገው በግለሰባዊ አስተያት ላይ የተመሰረተ መፍትሄ ሳይሆን የሚያዳምጥ ጆሮ፤ ለመረዳት የሚሞክር ልብና ተገቢው ህክምና ነው፡፡ ከራሳችን ተሞክሮ ወይም ከዚህ በፊት ካጋጠሙን ሰዎች በመነሳት አስተያየት መስጠት ቀላል ነው፡፡ ቃላት ሀይል እንዳላቸው መዘንጋት የለብንም፡፡ የማቅናት ወይም የመስበር፣ የመርዳት ወይም የመጉዳት፡፡ስለዚህ የምንናገረውን መመዘኑ አስፈላጊ ነው፡፡

 

የአእምሮ ህመም ያለበት ሰው እንደማንኛውም ሰው ህልም፣ተስፋ፣ፍላጎት አለው፡፡ የተለየ አዘኔታ ወይም ትችት ሳይሆን እንደማንኛውም ሰው ፍቅርና አክብሮት ነው የሚያስፈልገው፡፡